गरुडा, रौतहट – रौतहटको गरुडास्थित खानेपानी तथा सरसफाइ उपभोक्ता समितिको नयाँ नेतृत्वका लागि भएको छनोट प्रक्रियाबाट दिलीप पटेल अध्यक्ष पदमा निर्विरोध निर्वाचित हुनुभएको छ। संस्थाको विशेष साधारण सभा तथा अधिवेशनका क्रममा अन्य कुनै उम्मेदवारी नपरेपछि पटेलको नेतृत्वमा नयाँ कार्यसमिति सर्वसम्मत रूपमा चयन भएको हो।स्थानीय उपभोक्ताहरूको व्यापक उपस्थिति र सहमतिमा निर्वाचन समितिले पटेललाई अध्यक्ष पदमा निर्विरोध निर्वाचित भएको घोषणा गरेको हो। गरुडा क्षेत्रमा खानेपानीको व्यवस्थापनलाई चुस्त र प्रभावकारी बनाउन स्थानीय बासिन्दाहरूले पटेलको नेतृत्वलाई सर्वसम्मत रूपमा स्विकारेका हुन्।निर्विरोध निर्वाचित भएपछि संक्षिप्त प्रतिक्रिया दिँदै नवनिर्वाचित अध्यक्ष दिलीप पटेलले आफूलाई पत्याएर ठूलो जिम्मेवारी सुम्पिएकोमा सम्पूर्ण उपभोक्ता, स्थानीय भद्रभलाद्मी तथा सरोकारवालाहरूमा हार्दिक आभार व्यक्त गर्नुभयो। उहाँले भन्नुभयो, “गरुडाबासीलाई स्वच्छ, सफा र नियमित खानेपानीको पहुँच पुर्‍याउनु मेरो मुख्य संकल्प हो। संस्थालाई पारदर्शी र जनउत्तरदायी ढंगले अगाडि बढाउनेछु।”नयाँ कार्यसमिति गठनसँगै गरुडा क्षेत्रमा लामो समयदेखि देखिँदै आएका खानेपानीका प्राविधिक तथा व्यवस्थापकीय समस्याहरू समाधान हुने र खानेपानीको आपूर्ति थप सुदृढ बन्ने स्थानीय उपभोक्ताहरूले विश्वास व्यक्त गरेका छन्। नवनिर्वाचित समितिका पदाधिकारीहरूलाई स्थानीय बासिन्दा तथा समर्थकहरूले अविर र माला लगाएर बधाई एवं सफल कार्यकालको शुभकामना दिएका छन्।